ESCOLAS
As escolas de Cántigas e Frores veñen
funcionando regularmente dende hai moitos anos. En concreto, as de
baile infantil comezaron o seu funcionamento regular en setembro
de 1972. Dende entón, non ten pasado un curso sen impartirse
estas disciplinas. Por outra banda, aínda que sempre tivemos
escolas de gaita e percusión, estas funcionan contínuamente,
do mesmo xeito regular que na actualidade, dende outubro de 1995.
Estas escolas acollen a máis de 200
alumnos cada ano, ademais dos 120 que asisten ao “Curso
de cultura tradicional Galega” na Semana Santa. Durante o curso escolar organizamos Festivais
en datas próximas ao día do pai e ao da
nai, finalmente unificados nun só chamado Festival de Primavera, coa fin de que as familias,
os membros da asociación, e todos os veciños de Lugo interesados na cultura tradicional, podan constatar os progresos do noso alumnado. Durante a historia de Cántigas estes Festivais
téñense realizado en diferentes emprazamentos dentro da cidade, coma fora o Gran
Teatro ou o Auditorio Municipal. Do mesmo xeito, ao remate do
curso escolar facemos unha actuación nunha praza
da cidade para as escolas infantís e tamén as de adultos, de xeito que os veciños de
Lugo e a xente de fóra podan ver a calidade do traballo tanto dos máis
pequenos coma dos maiores que se están a formar na nosa Asociación.
Os alumnos agrúpanse nas distintas
actividades docentes nos grupos infantís, xuvenís e
de adultos (iniciación e perfeccionamento) de gaita, percusión
tradicional, baile tradicional, acordeón,
canto e pandeireta e, nalgunhas ocasións, violín, zanfona ou mesmo patronaxe para a confeción do vestiario tradicional.